Unde — Речь для всех

Басты бет/Жоба туралы

Unde — қазақ және орыс тілдерінде баланың тілін дамытуға арналған тегін екі тілді платформа. Мұнда үйде баланың тілін қалай қолдауға болатынын, қашан алаңдау керектігін және тіл шығуы кешіксе не істеу керектігін білесіз.

Мен Қазақстандағы әрбір отбасы қай жерде тұрса да, табысы қандай болса да, түсінікті әрі сенімді қолдау ала алса екен деймін. Логопедиялық материалдары бар тегін сайттардың аз екені жасырын емес. Ал қазақ тілінде сөйлейтін отбасылар көбіне ана тілінде көмексіз қалады. Unde осы олқылықтың орнын толтыруға көмектеседі.

Платформада не бар

Скрининг. Қысқа сауалнама баланың тілі жасына сай дамып жатқанын және маманға жүгіну қажет пе, жоқ па екенін түсінуге көмектеседі.

Бейнесабақтар. Логопедтер теорияны түсіндіріп, баламен үйде қайталауға болатын жаттығулар мен ойындарды көрсетеді.

Материалдар. Құралдарды, карточкаларды және ұсыныстарды тегін жүктеп алуға болады.

Барлық контент екі тілде, тіркеусіз және ақысыз қолжетімді.

Бәрі қалай басталды

Жоба идеясы менің отбасым баланың тіл мәселесіне тап болған кезде пайда болды. Ата-ананың қалай абдырап қалғанын көрдім. Бұл қалыпты жағдай ма, кімге бару керек, неден бастау керек, бәрі түсініксіз болды. Ең қиыны, көмек дәл қазір қажет болса да, логопедпен тұрақты сабақ өткізуге әр отбасының бірдей шамасы келе бермейтінін түсіну еді.

Қолданбалы лингвистика мамандығының студенті және ағылшын тілі оқытушысы ретінде мен тілдің бала дамуына қаншалықты әсер ететінін және көмектің отбасының тілінде берілуі тиіс екенін түсінемін. Сол кезде ата-аналарға түсінікті жауап алып, баласына бүгіннен бастап, тегін әрі ана тілінде көмектесе алатын орын керек екенін ұқтым. Неғұрлым ерте бастаса, баланың құрдастарын қуып жету мүмкіндігі соғұрлым жоғары. Unde идеясы осылай туды.

2026 жылы жоба Middlebury College (АҚШ) ұсынатын Projects for Peace грантын жеңіп алды. Бұл жергілікті қауымдастықтардың өмірін өзгертетін жастар бастамаларын қолдайтын халықаралық бағдарлама. Грант маған идеяны жұмыс істейтін платформаға айналдыруға мүмкіндік берді.

Содан кейін команданың жұмысы басталды. Step by Step орталығының білікті логопедтері ата-аналарға арналған қолжетімді бағдарлама әзірледі. Біз бейнесабақтар түсіріп, барлық материалдарды жинап, осы сайтты жасадық.

Енді мұнда кез келген уақытта, кез келген жерден қайта оралуға болатын сенімді ақпарат, практика және материалдар бар.

Unde сізге және балаңызға көмектеседі деп шын жүректен сенемін. Әрбір жаңа сөз кішкентай жеңіс болсын! 💛

Жоба командасы

Искакова Анара Габдрахмановна

Білімі: Омбы мемлекеттік педагогикалық университеті (2006 ж.), мамандығы — мұғалім-логопед («Логопедия» мамандануы).

20 жыл жұмыс өтілі бар практик логопед-дефектолог, «Step by Step» психологиялық-логопедиялық түзету орталығының басшысы, жас және практик мамандардың тәлімгері. Дамуында ерекшеліктері бар балалармен жұмыс істеуде мол практикалық тәжірибесі бар. Республикалық конференциялардың спикері, қазақ тіліндегі сөздің буын құрылымын қалыптастыру бойынша әдістемелік құралдардың тең авторы.

Кабиева Зарина Советовна

Білімі: Әлкей Марғұлан атындағы Павлодар педагогикалық университеті (бұрынғы Павлодар педагогикалық институты), 2017 жыл. Мамандығы: логопед, жұмыс тәжірибесі — 10 жыл.

Аутизм спектрі бұзылыстары (АСБ) бар балалармен жұмыс істеуге маманданған. Астана қаласындағы Asar Qadam түзету орталығының жетекшісі. Қазақ тіліндегі «Сөздің буындық құрылымы» оқу құралының тең авторы. Жас мамандардың тәлімгері.

Нуркенова Фатима Дюсембаевна

2023 жылы М. Қозыбаев атындағы Солтүстік Қазақстан университетінің бакалавриатын бітірді. Білім беру бағдарламасы — «Дефектология», мамандануы — «Логопедия».

2025 жылы А. Мырзахметов атындағы Көкшетау университетінің магистратурасын «Педагогика және психология» білім беру бағдарламасы бойынша бітірді.

Жұмыс өтілі: 3 жыл.

Сөйлемейтін балалармен, сондай-ақ ауыр сөйлеу бұзылыстары, аутизм спектрінің бұзылысы (АСБ), зейін тапшылығы және гиперактивтілік бұзылысы (ЗТГБ) және психикалық дамуы тежелген (ПДТ) балалармен жұмыс істейді.

Сөйлеу бұзылыстарын түзетумен айналысады: сөйлеуді іске қосады, дыбыстарды қояды және автоматтандырады, сөздің буын құрылымын түзетеді, фонематикалық естуді дамытады, сөздік қорды кеңейтеді және грамматикалық тұрғыдан дұрыс сөйлеуді қалыптастырады.